蔡連真 【教學分享】

為著欲共囡仔分析仝字無仝款的音，就舉例「天」，這字會使讀 thinn，造詞親像：天頂、天公伯、天跤下、天氣、好天、歹天等等，嘛會當讀thian，親像：天下、 天才、天災、天文地理等等，有各種無仝款的讀法來做分別，才閣利用遮的詞來做造句，親像：


1. 今年受著天公伯仔的照顧，減少真濟天災地變的發生。

2. 天跤下欲閣去揣親像伊遐爾天才的人，實在真歹揣矣。

利用這造句來訓練囡仔對台語的了解程度佮組成語句的能力。

雄雄煞有囡仔喝講：老師！猶有「天天」啦，心肝內想講這个囡仔，平常時一定真乖攏有咧用台語佮人開講破豆，才會知影「天天」這个名詞。

我就問學生仔「天天」是啥物意思，差不多所有的囡仔攏回答是天兵、戇戇的人、笨跤笨手的人、袂曉處理代誌的人、問東答西的人、逐工的意思⋯⋯。

 

遮爾濟的答案，攏毋是我心肝底所預料的，我就舉例來予 in聽，親像：

1. 伊規工攏激天天，油電就欲起大價矣，抑攏無要無緊。

2. 阿媽共阿爸講：囡仔的成績按怎，三頓有照起工--無，你嘛愛斟酌一下，毋通規工激天天。

囡仔聽了嘛猶閣親像鴨仔咧聽雷咧，到底「天天」欲按怎解說學生仔才會了解咧。

我就想著目前電視網路上，上蓋流行的一句話「淡定」，來做解說講：天天的意思，並毋是袂曉抑是戇戇痟痟的意思，嘛毋是你講東伊去做西的意思，這个激天天的人，無定著啥物代誌伊攏知，凡勢嘛是真會曉處理工課的人，更加有可能伊是真巧、真精光的人，只不過是無來共代誌囥佇心肝內，當做伊是佮代誌攏無關係的第三者，無想欲插雜雜滴滴的工課爾爾，我用「淡定」 這兩字當咧時行的字，來解說「天天」的意思，

閣再利用例句來做比較：

1. 囡仔哭甲遐大聲，你嘛鬥騙一下，莫激甲遐爾仔「淡定」。改 換做：囡仔哭甲遐大聲，你嘛鬥騙一下，莫閣激仔「天天」。

2. 講欲予你請食豆乾，你敢真正遐爾「淡定」，攏總無聽見。 改換做：講欲予你請食豆乾，你就激「天天」，當做無聽著。

用按呢來做比較；予囡仔聽起來，in 對「天天」這个詞比較就較有觀念矣。

咱所有的先進，後學這種譬喻毋知有適當 -- 無，敬請指教， 向望逐家會當智識相交換，共同來為台語文盡淡薄仔心力。 多謝！感恩！

 

附註：補充說明

1. 因為課本內容是遊天河，所以用「天」做解說。
2.「天天」若是欲用華語應該會當用『裝聾作啞』、『若無其事』、『無關緊要』的意思來做解說，囡仔應該會閣較理解。
3. 淡定的台語嘛會當用 sip-sip  來解說。