斐濟是佇澳洲東爿的太平洋面頂的國家，伊的土地包括三百外个島嶼，「斐濟(Viti)」就是東加語的「島嶼」的意思。

斐濟的國旗底是藍色的，倒手爿是英國國旗，正手爿是斐濟傳統的盾，盾內底有獅、甘蔗、弓蕉、粉鳥佮椰子。因為斐濟捌予英國殖民將近一世紀，所以佇in的國旗內底，才會看著英國的國旗；甘蔗、弓蕉佮椰子是in遮重要的經濟作物，粉鳥代表和平，獅代表權利，藍色就親像太平洋的海水。



這面國旗，對1970年開始使用，斐濟國內攏一直有人認為應該愛共英國的國旗提掉，表示斐濟是一个獨立的國家。2013年，斐濟的總理嘛宣布講，in會開始設計新的國旗，設計的概念是欲「表達全新的民族意識，予家己新的『斐濟人』身份認同，有信心通徛佇國際的舞台頂」。所以，無定誠緊就會當看著斐濟的新國旗喔。