手機仔、平板電腦，會當講是這馬真濟人生活中無法度欠缺的物件，毋管佇佗位，攏會使看著遮的科技產品。逐个牌子嘛攏一直推出上新、上奅的新產品，科技產品的壽命嘛愈來愈短，有當時仔，你的手機仔出問題，提去欲修理，煞發現修理比買一隻新的閣較貴，不如換新的較規氣。

毋過，敢真正無法度生產出耐操閣好用的產品？

德國有一支紀錄片，內底的主角伊的印表機害去矣，伊想欲提去修理，問幾若間店，人攏共講，修理比買新的較貴，建議伊買一台新的。這聽起來敢若真合理，毋過伊感覺誠奇怪。後來，伊發現印表機的主機板頂懸，有一塊晶片，若是印表機使用到一定的量，這塊晶片就會傳出錯誤訊息，予機器無法度閣運作。毋過，只要共這塊晶片的記錄『歸零』，就閣會當繼續使用矣。

電火泡仔是另外一个例。美國一間消防局內底有一粒電火泡仔已經用超過110冬矣，in當咧共這粒電火泡仔「過生日」，有夠心適。毋過，你敢有算過恁兜的電火泡仔會當用偌久？半年、一年抑是三年？

110年聽起來真譀古，咱按怎嘛想袂到，厝裡的電火泡仔會當活比咱閣較久，因為這馬的電火泡仔無可能用遐久啊。


1920年代開始，生產電火泡仔的廠商開始推動一項計畫，欲將電火泡仔的壽命限制佇1000點鐘以下，無達到這个目標的生產線閣會予人處罰。按呢做，就是欲保證市場對電火泡仔的需求永遠攏袂減少。

這號狀況，佇經濟上號做『計畫性汰舊』，就是限制產品的壽命，時間一到，咱就一定愛閣買新的，講起來，就是廠商佇產品內底「創空」。不斷創造需求，予咱佇物質生活上一直追求，對環境嘛是一種傷害。

甘地捌講過：「地球會當滿足每一个人的需要，煞無法度滿足人類的痟貪。」